قصيدة: وان كان حذرني من الفرس صهيوني
للشاعر كامل الحليلي
“
البارحه قبل نومي يكحل عيوني
وصلتني رسالة التذكير والذكرى
مكتوب فيها السلام بخط فرعوني
من واحدٍ كان لا يكتب ولا يقرا
وانا اعرف اللي يبي ومصدق ظنوني
مسارج النور ما توخذ من الغدراء
ماني بجاهل يتابع فيلم كرتوني
ادري بخط القلم قبل القلم يبرى
رسم الحمامة ومعها غصن زيتوني
لا يمنع اطلاق نار ولا يفك أسرى
والجمجمة والعظام شعار ماسوني
مخفيه الاعلام لا يذكر ولا يطرى
لا ترسلون السلام ولا تنادوني
الحر ما ينخدع بالضحكة الصفراء
طرفة بن العبد والمتلمّس اعطوني
نبذه عن رسالة التهديد والبشرى
وإن كان حذرني من الفرس صهيوني
قلت النبي قال لا كسرى بعد كسرى
العام حجيت والحجاج شافوني
اكبّر الله واحذف الجمرة الكبرى
والحجّي اللي يقول انتم تحذفوني
قلت انتبه لا يصيبك جرح ما يبرى
اليوم زحمة ورمي و كتف قانوني
والناس يرمون باليمنى و باليسرى
واليوم ياللي على الخوة تعزموني
محرماً معكم المسراح والمسرى
خلاص روحوا بدوني لاتحرّوني
أبا اتجرا على درب الهجر واجرا
عشنا على العز ماعشنا على الهوني
و العز للنفس لا يهدى ولا يشرى